Өнгөрсөн шөнө Увс аймгийн 15 сумын нутгаар ууландаа цас, тал газартаа бороо орж хоножээ. Одоогоор Өндөрхангай, Зүүнхангай, Цагаанхайрхан, Баруунтуруун гэсэн хангайн сумдад цас, бороо холилдон орсоор байна. Өнөө өглөөний 8 цагийн байдлаар Хяргас суманд 26 мм, Өндөрхангайд 3,4 мм, Малчинд 12 мм, Цагаанхайрханд 5 мм хур тунадас ороод байна гэсэн мэдээллийг аймгийн Ус, цаг уур, орчны шинжилгээний төвд тухайн сумдын цаг уурын станцаас ирүүлжээ.
Аймгийн Ус, цаг уур, орчны шинжилгээний төвийн инженер М.Отгонхүү “Өнөөдрөөс эхлээд аймгийн нийт нутгаар цочир хүйтэрч байна. Энэ хүйтэн 3-4 хоног хадгалагдах байх. Шөнөдөө уулархаг нутгаар 0-5 хэм хүйтэн хонох бөгөөд цаг агаар хасах хэм рүү орж байна” гэлээ.
