Ерөнхийлөгч У.Хүрэлсүхийн ОХУ-д хийж буй албан ёсны айлчлал үргэлжилж байна.

Тэрээр яг одоо ОХУ-ын Ерөнхийлөгч В.В.Путинтэй уулзаж байгаа бөгөөд уулзалт Улаанбаатарын цагаар 21:00 цаг орчимд өндөрлөнө. Үүний дараа хоёр улсын Ерөнхийлөгч хамтарсан мэдэгдэл хийнэ.

Ерөнхийлөгч У.Хүрэлсүх "Хүн төрөлхтөн цар тахалтай тэмцэж буй энэ хүнд хэцүү цаг үед манай хоёр орны дипломат харилцаа тогтоосны 100 жилийн ойн түүхэн арга хэмжээний хүрээнд харилцан айлчлалыг зохион байгуулж буй Ерөнхийлөгч танд талархал илэрхийлье. 

Манай хоёр орны хооронд олон жил яригдсан аж ахуйн шинжтэй асуудлууд шийдэгдсэн гэж хэлж болно. Хоёр орны харилцааг улам хөгжүүлэх, шинэ шатанд гаргах цаг үе ирж байна. Европ, Азийг холбосон өргөн уудам нутагт манай Монгол Улс оршдог. Би Ерөнхийлөгчөөр сонгогдсоныхоо дараа "Транзит Монгол" болох зорилт дэвшүүлсэн" хэмээлээ.

Хоёр улсын Ерөнхийлөгчийн уулзалт ганцаарчилсан хэлбэрээр үргэлжилж байна.