Аймаг, нийслэл, сум, дүүргийн Иргэдийн төлөөлөгчдийн хурлын 2025 оны нөхөн сонгууль ирэх зургаадугаар сарын 22-нд болохтой холбогдуулан Улсын бүртгэлийн ерөнхий газар сонгогчдын нэрийн жагсаалтыг 2025 оны гуравдугаар сарын 24-нд цахим хуудсандаа байршуулав.

Сонгогчдын нэрийн жагсаалтад сонгуулийн эрх бүхий иргэдийн эцэг, эхийн нэр, өөрийн нэр, нас, хүйс, иргэний бүртгэлийн дугаар, байнга оршин суугаа газрын хаягийн бүртгэлийн мэдээллийг багтаасан бөгөөд уг жагсаалтыг тухайн аймаг, сум, баг, нийслэл, дүүрэг, хороогоор болон сонгуулийн хэсэг бүрээр нэгтгэн гаргаж, сонгууль дуустал цахимд байршуулах хуультай.

Иргэд https://burtgel.gov.mn/ хаягаар нэвтэрч “Аймаг, нийслэл, сум, дүүргийн ИТХ-ын 2025 оны нөхөн сонгуулийн сонгогчдын нэрийн жагсаалт” цонхыг идэвхжүүлэн иргэний бүртгэлийн дугаар, бүртгэлтэй хаягийн мэдээллээ оруулж, өөрийн нэрийн жагсаалтад бүртгэлтэй эсэхээ шалгах боломжтой.

Энэ оны гуравдугаар сарын 21-ний өдрийн байдлаар хоёр аймгийн ИТХ-ын тус бүр нэг, 18 аймгийн 58 сумын ИТХ-ын 68 мандатад нөхөн сонгууль явуулах шийдвэрийг тухайн шат шатны ИТХ гаргаад байна.

Эх сурвалж: Улсын бүртгэлийн ерөнхий газар.