Монголын морин спорт, уяачдын холбооны тэргүүлэгчид 2024 оны хамгийн өндөр чансаатай уяачид, уралдаанч хүүхдүүд, хурдан хүлгүүдийг шалгаруулж, шилдгүүдийг зарлалаа.
Шилдэг уяачдын тэргүүнд Тод манлай уяач М.Алтан-Очир
Энэ жилийн хамгийн өндөр чансаатай уяачаар Тод манлай уяач М.Алтан-Очир шалгарлаа. Тэрбээр 2023 онд улсын болон бүсийн хэмжээний уралдаанд зургаан удаа түрүүлж, есөн удаа айрагдсан амжилтаар тэргүүлсэн байна.
Түүнээс гадна Тод манлай уяач О.Батбилэг, Б.Лхагва-Очир, алдарт уяач У.Тамир, Г.Болдбаатар нар шилдэг таван уяачийн эгнээнд багтсан бол Тод манлай уяач Т.Ихбаяр, уяач Д.Гомбосүрэн, алдарт уяач А.Нямбаатар, Г.Даваадалай нар эхний есөн байрт шалгарчээ.
Шилдэг уралдаанч хүүхдүүдийн тэргүүнд Г.Хаш-Эрдэнэ
2024 оны хамгийн өндөр чансаатай есөн уралдаанч хүүхдийг шалгаруулахад Сонгинохайрхан дүүргийн Г.Хаш-Эрдэнэ тэргүүлсэн байна. Тэрбээр улсын болон бүсийн уралдаанд нэг түрүүлж, найман удаа айрагдсан амжилтаараа бусдыгаа манлайлжээ.
Түүний дараа Багахангай дүүргийн С.Өлзийхүү, Төв аймгийн Батсүмбэр сумын Н.Билэгсайхан, Баянцогт сумын О.Цэнгүүн, Сүхбаатар аймгийн Баруун-Урт сумын И.Бат-Ирээдүй, Б.Пүрэвдаваа, Төв аймгийн Баян-Өнжүүлийн Б.Бат-Эрдэнэ, Дундговь аймгийн Сайнцагаан сумын Б.Намчин, Төв аймгийн Зуунмод сумын Г.Отгонсүх нар эхний есөн байрт жагссан байна.
Шилдэг хурдан хүлгүүдийг тодрууллаа
Энэ жил азарга, их нас, сонгомол дээд насны есөн хурдан хүлгийг шилдгээр тодруулжээ. Эдгээр хүлгүүдийн нэрсийг тун удахгүй олон нийтэд дэлгэрэнгүй танилцуулах юм.
Монголын морин спорт, уяачдын холбооноос энэхүү шалгаруулалтыг жил бүр уламжлал болгон зохион байгуулж, уяачид, уралдаанч хүүхдүүд, хурдан хүлгүүдийн амжилтыг дүгнэдэг. 2024 оны шилдгүүд ийнхүү тодорч, морин спорт сонирхогчдын дунд баяр бахархал, урам зориг бадрааж байна.
