Монголын жүдо бөхийн өсвөр үеийн улсын аварга шалгаруулах тэмцээн Улаанбаатар хотын “Буянт-Ухаа” спортын ордонд амжилттай үргэлжилж байна. Энэхүү тэмцээн нь орон даяар хамгийн олон оролцогч хамруулдгаараа онцлог бөгөөд энэ удаа 21 аймаг, нийслэлийн 9 дүүргээс шалгарсан 87 багийн 2025 өсвөрийн жүдочид хүрэлцэн иржээ.
Тэмцээн бага, дунд, ахлах насны ангиллаар явагдаж, эрэгтэй 38, эмэгтэй 29 жинд шилдгүүдээ тодруулж байгаа юм. Монголын жүдо бөхийн холбооноос энэ удаагийн тэмцээнд жин тус бүрийн аваргууддаа дотоодын улаан backnumber гардуулж байгаагаараа онцлог болж байна.
Нээлтийн үеэр насанд хүрэгчдийн Дэлхийн аварга шалгаруулах тэмцээний хошой хүрэл, “Рио-2016” олимпын хүрэл медальт тамирчин Г.Отгонцэцэг тус тэмцээнд хүрэлцэн ирж, бяцхан жүдочдод үзүүлэх тоглолт хийсэн нь тэдний урам зоригийг улам бүр нэмэгдүүлэв.
Тэмцээнд хамгийн олон тамирчин илгээсэн аймгаар Хөвсгөл болон Увс тодорчээ. Хөвсгөлөөс 84, Увс аймгаас 60 жүдоч оролцож байгаа бөгөөд тэд Улаанбаатар хотод ирж, медалийн төлөө хүч үзэж байна.
Эх сурвалж: Монголын жүдо бөхийн холбоо
