Монгол Улсын Засгийн газар 2024-2028 оны үйл ажиллагааны хөтөлбөртөө “Бүсчилсэн хөгжлийн бодлого”-ыг тэргүүлэх зорилт болгон хэрэгжүүлж буй. Энэ нь “Алсын хараа-2050”, “Шинэ сэргэлтийн бодлого”, “Бүсчилсэн хөгжлийн үзэл баримтлал”-тай уялдан, бүс бүрийн хөгжлийн нэгдмэл төлөвлөлтийг хэрэгжүүлэхэд чиглэж байна.
Тус зорилгын хүрээнд бүс бүрт зөвлөл байгуулж, салбар хоорондын уялдааг хангах, бүс нутгийн онцлогт тулгуурласан хөгжлийн бодлого боловсруулах ажиллагаа өрнөж байна. Үүний эхлэл болгож “Хангайн бүсийн зөвлөл анхдугаар хуралдаан”-ыг өнөөдөр Архангай аймгийн “АРА АРЕНА” цогцолборт зохион байгуулж байна.
Хуралдаанаар:
-
Бүсийн зөвлөлийн үйл ажиллагааны үндэс, зохион байгуулалтыг тодорхойлох
-
Бүсийн хөгжлийн бодлогыг салбарын төлөвлөгөөнд нийцүүлэх
-
Бүсүүдийг хөгжлийн ерөнхий төлөвлөгөө, зорилтот хөтөлбөртэй болгох
-
Бүсийн хэмжээнд бизнес эрхлэх таатай орчин бүрдүүлэх арга замуудыг хэлэлцэнэ.
Уг хуралдаанд Монгол Улсын Ерөнхийлөгчийн Тамгын газар, Улсын Их Хурал, Засгийн газрын гишүүдээс гадна Хангайн бүсийн Архангай, Баянхонгор, Өвөрхангай аймгийн төлөөлөл, бүсийн зөвлөлийн гишүүд, сум, аймгийн төрийн албан хаагчид, хувийн хэвшлийнхэн, эрдэмтэн судлаачид, олон улсын байгууллага, иргэдийн төлөөлөл гээд нийт 500 гаруй хүн оролцож байна.
Эх сурвалж: Монгол Улсын Шадар сайдын Хэвлэлийн алба.
