“Apple” компани Хятад улсад 720 сая юанийн буюу 100 орчим сая ам.долларын санхүүжилттэй шинэ цэвэр эрчим хүчний сан байгуулна гэдгээ мэдэгдлээ. Энэхүү шийдвэр нь компанийн гүйцэтгэх захирал Тим Күүкийн Бээжинд хийж буй айлчлалтай зэрэгцэн зарлагдсан бөгөөд Хятадад сэргээгдэх эрчим хүчний төслүүдийг дэмжих, өргөжүүлэх зорилготой юм.
Apple 2030 он гэхэд нийлүүлэлтийн сүлжээгээ бүрэн сэргээгдэх эрчим хүчинд шилжүүлэх зорилго тавьсан бөгөөд тус шинэ сан энэ ажлыг урагшлуулах чухал алхам болно гэж үзэж байна. Компанийн мэдээлснээр, Хятадад 2018 онд байгуулсан анхны цэвэр эрчим хүчний сан амжилттай хэрэгжиж, 14 мужид 1 гигаваттаас дээш эрчим хүч үйлдвэрлэх хүчин чадал бүхий төслүүдийг дэмжжээ.
Үүнээс гадна “Apple” ирэх дөрвөн жилийн хугацаанд АНУ-ын эдийн засагт 500 тэрбум ам.долларын хөрөнгө оруулалт хийхээр төлөвлөж буйгаа өмнө нь мэдэгдсэн. Тус төлөвлөгөөнд хиймэл оюун ухааны серверийн үйлдвэрийг Техас мужид байгуулж, улс орон даяар судалгаа, хөгжүүлэлтийн чиглэлээр 20 мянган ажлын байр шинээр бий болгох аж.
2025 оны эхний улирлын санхүүгийн тайлангаас харахад “Apple” 124.3 тэрбум ам.долларын орлого олж, өмнөх оны мөн үеэс 4 хувиар өссөн бол цэвэр орлого 36.33 тэрбум ам.долларт хүрч, 7.1 хувиар нэмэгджээ. Энэ нь компанийн түүхэн дэх хамгийн өндөр орлоготой улирал болж тэмдэглэгдэж байна.
Мөн даваа гаргийн "Nasdaq" биржийн арилжаанд “Apple”-ийн хувьцаа 1.05 хувиар өсч, 220.57 ам.долларт хүрсэн тухай Forbes мэдээлэв.
Эх сурвалж: Forbes.
