Өмнөд Солонгосын автомашин үйлдвэрлэгч “Hyundai” компани АНУ-ын Луизиана муж улсад олон тэрбум ам.долларын өртөг бүхий гангийн үйлдвэр барих шийдвэр гаргаснаа албан ёсоор зарлалаа. Тус үйлдвэрийг байгуулахад нийт 5.8 тэрбум ам.доллар зарцуулагдаж, 1300 ажлын байр шинээр бий болох бөгөөд энэхүү хөрөнгө оруулалт нь АНУ дахь бие даасан, тогтвортой нийлүүлэлтийн сүлжээг бий болгоход чухал нөлөө үзүүлнэ гэж компанийн гүйцэтгэх захирал Чон Юйсон онцолжээ.

Цагаан ордонд Ерөнхийлөгч Дональд Трампын дэргэд болсон мэдэгдлийн үеэр Чон Юйсон “АНУ-д үйлдвэр байгуулах нь компанийн хувьд урт хугацааны стратегийн нэг хэсэг бөгөөд Америкт автомашины үйлдвэрлэл, борлуулалтаа улам өргөжүүлэхэд чиглэж байна” хэмээн мэдэгдэв.

АНУ-ын Ерөнхийлөгч Д.Трамп үүрэгт ажилдаа орсноос хойш гадаадын хөрөнгө оруулалтыг дэмжих, үйлдвэрлэлээ АНУ руу шилжүүлэх компанид урамшуулал үзүүлэх бодлого баримталж буй. Харин энэ шаардлагыг биелүүлэхгүй бол өндөр татвар ногдуулна хэмээн анхааруулж байсан нь гадаадын томоохон компаниудыг Америк дахь үйл ажиллагаагаа тэлэхэд хүргэж байна.

Трамп “Hyundai” компанийн шийдвэрийг сайшааж, “манай улс руу урьд хожид байгаагүй хэмжээнд хөрөнгө оруулалт орж ирж байна. Энэ бол татварын бодлогын эерэг үр дүн” хэмээн тодотгосон байна. Мөн Америкт ган үйлдвэрлэж, автомашинуудаа дотооддоо угсрах нь “Hyundai” компанид татварын ямар нэгэн дарамт үүсгэхгүй болно гэж нэмж мэдэгдэв.

Эх сурвалж: AFP