Монгол Улсын 2023 оны төсвийн төслийг дахин боловсруулж, ард иргэдийн цалин тэтгэврийг нэмэгдүүлэх, бараа бүтээгдэхүүний үнийг тогтворжуулж, ипотекийн зээлийн асуудлыг хуулийн хүрээнд шийдэх, хүний эрхийн чиглэлээр бодитой арга хэмжээг авч, хэрэгжүүлэх шаардлагыг энэ сарын 17-ны өдөр Ардчилсан намаас Засгийн газарт хүргүүлсэн билээ.

Энэхүү шаардлагынхаа хариуг хүлээн авч, 2023 оны улсын төсвийн төслийн асуудлаар МАН-тай хамтран ажиллах ажлын хэсгийг байгуулсан талаар Ардчилсан намаас мэдээлэл хийлээ. 

Энэ үеэр Нийслэлийн АН-ын дэд дарга А.Цэрэнбат “Бид шаардлагынхаа хариуг аравдугаар сарын 19-ний өдөр авсан. Засгийн газрын зүгээс бидний шаардлагын дагуу хэлэлцэж дараах хариултыг өгсөн.

Монгол Улсын 2023 оны төсвийн төсөл хэлэлцэгдэж байгаа энэ үед энэхүү шаардлагад дурдсан асуудлаар ажлын хэсэг байгуулж, хамтран ажиллах нь зүйтэй хэмээн үзэж АН-аас ажлын хэсгийн бүрэлдэхүүнд орж ажиллах албан тушаалтны нэрийг ирүүлнэ үү гэсэн хариуг авсан.

Энэхүү хариултын дагуу АН-ын даргын зөвлөл хуралдаж МАН-тай хамтран ажиллах ажлын хэсгийг байгуулсан. Ажлын хэсгийн даргаар Үндэсний бодлогын хорооны дэд дарга Д.Эрдэнэсувд, Төрийн байгуулалтын бодлогын хорооны дарга Д.Ганбаяр, АН-ын ёс зүйн сахилгын хорооны дарга А.Цэрэнбат, Нийслэлийн АН-ын дэд дарга Р.Даваадорж, УИХ дах АН-ын бүлгийн эдийн засгийн зөвлөх Н.Болдбаатар, Ардчилсан залуучуудын холбооны тэргүүн Н.Отгончулуун, Эдийн засгийн хорооны гишүүн Б.Дэлгэрмаа нар МАН-тай хамтран 2023 оны төсвийн талаар хэлэлцэж, АН-аас өгсөн шаардлагыг биелүүлэх ажлыг судлан ажиллана" гэлээ.