УИХ-ын Төсвийн байнгын хорооны хуралдаанаар Аж ахуйн нэгжийн орлогын албан татварын тухай болон Гаалийн тариф, татварын тухай хуулийн төслийг хэлэлцэв. Уг хуулийн төсөлд цахилгаан, дулааны эрчим хүчний эх үүсвэрийн тоног төхөөрөмж үйлдвэрлэх үйл ажиллагааны орлогод ногдох албан татварыг 90 хувь хөнгөлөх талаар тусгасан байна.
Энэ үеэр Эрчим хүчний сайд Б.Чойжилсүрэн "Газад шилжихгүй бол бид нүүрсээ түлэхээс өөр арга байхгүй. Худлаа ярьж, ард түмэнд боломжгүй зүйл амлахаа болъё гэж бодож байгаа. Өмнөх долоо хоног ОХУ-д ажиллаад ирлээ.
Монголоор дамжуулан тавигдах хийн хоолойн асуудлаар тодорхой хэмжээний мэдээлэл авсан. ОХУ, БНХАУ хоёр хоорондоо хэлэлцээ хийж байгаа юм байна. Хамгийн өөдрөгөөр төсөөлөхөд гэрээг энэ ондоо багтаан хийж магадгүй. Ингэсэн тохиолдолд 2024 онд багтааж газын хоолой барих ажлыг эхлүүлнэ. 5,800 километр хоолойг барьж байгуулахад хамгийн багадаа дөрвөн жил орчим хугацаа зарцуулна. Тэгэхээр манай улс 2029 оноос нааш хямд газтай болохгүй.
Дулаан болон цахилгааны хэрэглээ нэмэгдэж байгаа учраас Аж ахуйн нэгжийн орлогын албан татварын тухай болон Гаалийн тариф, татварын тухай хуулийн төслийг оруулж ирсэн. Ойролцоогоор 200 айлын янданг нийлүүлээд нэг дулааны цахилгаан станц байлгах бодлогыг яам баримталж байгаа.
Энэ онд хагас коксын үйлдвэрт Багануурт барих судалгааг хийж, Засгийн газраар шийдвэр гаргуулахаар ажиллаж байна. Ингэвэл дэгдэмхий 12 хувиас доош бууна. Багануурын нүүрсэнд энэ 42-46 тоо байгаа. Утааны хэмжээг багасгах тухай л ярьж байна. 200 айлын янданг нэгтгээд нэг дулааны станц руу оруулбал агаар мандалд цацруулах хорт хийн хэмжээ 10 дахин буурна. Огт утаагүй болгох асуудал байхгүй, дийлэхгүй" гэв.
