Нийслэлийн хэмжээнд 303 ерөнхий боловсролын сургуульд 380 мянга гаруй сурагч суралцаж байна. Эдгээрийн 76 хувь нь хотын төвд байрладаг бөгөөд 294 мянган сурагч эдгээр сургуульд суралцаж байгаа юм.

ЗХУТ-ийн дата мэдээлэлд тулгуурласан судалгаагаар ЕБС-ийн ойр орчимд замын хөдөлгөөний ачаалал ихэсдэг нь тогтоогджээ. Хичээлтэй үед өдөрт 241 мянган тээврийн хэрэгсэл хөдөлгөөнд оролцдог бол амралтын үед 132 мянга болж буурдаг байна.

Сургуулиудын төвлөрлийн асуудал:
Тухайлбал, нийслэлийн 31 дүгээр сургуулийн сурагчдын гуравны нэг нь харьяаллын бүсийн сурагч байдаг бол үлдсэн 65 хувь нь холоос зөөвөрлөгддөг аж. Судалгаагаар:

• 500 гаруй хүүхэд 10 км-ийн зайнаас,
• 1,000 орчим хүүхэд 3-5 км-ийн зайнаас тус сургуульдаа ирдэг нь тогтоогдсон байна.

Гэр хорооллын бүсэд сургууль барих төлөвлөгөө:
Хотын төвийн хэт төвлөрлийг сааруулах зорилгоор гэр хороололд дэд төвүүд байгуулж, ойролцоо нь сургуулиуд барихаар төлөвлөжээ.

• Эхний ээлжид дараах байршлуудад 12 бага сургууль барина:

  • Шархад – 4 сургууль
  • Сэлбэ – 4 сургууль
  • Баянхошуу – 2 сургууль
  • Толгойт – 2 сургууль

• Хоёрдугаар ээлжид хүртээмжгүй байгаа бусад бүсүүдэд 14 бага сургууль барихаар төлөвлөжээ.

Ингэснээр нийт 26 сургууль баригдаж, 21,800 сурагч сурах боломж бүрдэх юм. Энэхүү төлөвлөгөө нь сургуулийн төвлөрлийг сааруулж, замын хөдөлгөөний ачааллыг бууруулах ач холбогдолтой гэж үзэж байна.