Энэ оны нэгдүгээр сарын байдлаар Улаанбаатар хотын орон сууцны үнэ өмнөх оны мөн үеийнхээс 13.3 хувиар, өмнөх сарынхаас 0.5 хувиар өссөн талаар Үндэсний статистикийн хороо мэдээллээ.
Тодруулбал, шинэ орон сууцны үнэ жилийн дүнгээр 11.2 хувиар өссөн бол өнгөрсөн сараас хоёр хувиар буурсан үзүүлэлттэй байна. Харин хуучин орон сууцны үнэ өмнөх оны мөн үеэс 15 хувиар өсөж, өмнөх сараас 2.3 хувиар нэмэгдсэн байна.
Одоогоор шинэ орон сууцны нэг метр квадрат талбайн дундаж үнэ 4.53 сая төгрөг байгаа аж. Дүүргүүдээс хамгийн өндөр өсөлт Сүхбаатар дүүрэгт бүртгэгдэж, тус бүсэд шинэ орон сууцны үнэ 40 хувиар нэмэгдсэн байна. Харин Хан-Уул дүүрэгт шинэ орон сууцны үнэ 8.6 хувиар өссөн нь хамгийн бага өсөлттэй бүсээр тодорчээ.
Хуучин орон сууцны хувьд ч Сүхбаатар дүүрэг 30.6 хувийн өсөлтөөр тэргүүлж, Хан-Уул дүүрэг 12.5 хувийн өсөлттэй байгаа нь анхаарал татаж байна.
Эх сурвалж: Үндэсний статистикийн хороо
