Байгаль орчин, уур амьсгалын өөрчлөлтийн яамны Салбарын хяналтын газар, Нийслэлийн Байгаль орчны газар, Нийслэлийн агаар, орчны бохирдолтой тэмцэх газар хамтран 100 кВт-аас дээш хүчин чадалтай уурын болон усан халаалтын зуух ашиглаж буй нийт 139 объектын үйл ажиллагаанд хяналт шалгалт хийжээ.
Шалгалтын үр дүн
- 34 объект улирлын чанартай ажилладаг тул үйл ажиллагаа явуулаагүй.
- 5 объект төвийн дулааны шугам, хийн халаагуураар шийджээ.
- 100 орчим объектод шалгалт хийхэд давхардсан тоогоор 496 зөрчил илэрсэн.
Илэрсэн зөрчлүүд
- 35% нь байгаль орчинд нөлөөлөх байдлын үнэлгээгүй.
- 70% нь тухайн жилийн байгаль орчны менежментийн төлөвлөгөөгүй.
- 66% нь өмнөх оны байгаль орчны менежментийн төлөвлөгөөг тайлагнаж, дүгнүүлээгүй.
- 61% нь агаар, хөрс, усан орчны шинжилгээнд хамруулаагүй.
- 30% нь зуухны янданд шүүлтүүр суурилуулаагүй.
- 60% нь утаа шүүгч, үнс баригчийг зураг төслийн дагуу угсарч суурилуулаагүй.
- 75% нь зуухны яндангаас гарах хаягдал утаанд бохирдуулагч бодисын шинжилгээ хийлгээгүй.
- 67% нь агаарын бохирдлыг хянах дотоод хяналтын багажгүй, агаар бохирдуулсны төлбөр төлдөггүй, үнсийг битүүмжилсэн агуулахад хадгалаагүй.
- 20% нь цооног өрөмдөх, худаг гаргах зөвшөөрөлгүй.
- 76% нь ус ашиглах дүгнэлт, зөвшөөрөлгүй.
- 70% нь ус ашигласны төлбөр төлдөггүй.
- 42% нь зуухнаас гарсан үнс, хог хаягдлыг ангилан ялгадаггүй.
Шийдвэрлэж буй арга хэмжээ
- 50 аж ахуйн нэгжид Байгаль орчинд нөлөөлөх байдлын үнэлгээний тухай, Усны тухай, Хог хаягдлын тухай, Агаарын тухай хууль тогтоомж зөрчсөн гэж үзэн зөрчил шалган шийдвэрлэх ажиллагаа явуулж эхэлсэн.
- ЗХЖШ-ын харьяа цэргийн ангиуд, ШШГЕГ-ын харьяа хорих ангиуд, СЭМҮТ зэрэг төрийн байгууллагын усан халаалтын зуухны байгууламжид илэрсэн зөрчил, дутагдлыг арилгах албан даалгавар хүргүүлсэн.
- Улирлын чанартай үйлдвэрлэл эрхэлдэг, үйл ажиллагаа явуулаагүй аж ахуйн нэгжүүдэд хууль тогтоомжийн хэрэгжилтийг хангах мэдэгдэл, зөвлөмж хүргүүлсэн.
