Хэнтий аймгийн Хэрлэн суманд айлын гэр шатаж, хоёр настай хүүхэд өртөж амиа алдсан харамсалтай хэрэг гарчээ. Тус сумын 5 дугаар багт гэр шатаж байна гэсэн дуудлагыг онцгой байдлын алба долдугаар сарын сарын 3-ны 00:09 цагт хүлээн авсан байна.
Дуудлагын дагуу аймгийн Онцгой байдлын газрын Гал түймэр унтраах, аврах 32 дугаар ангийн алба хаагчид 3.5 км замыг туулан 00:12 цагт очиход дөрвөн ханатай гэр бүрэн шатаж байсныг 11 минут ажиллаж унтраажээ.
Уг гал түймэрт өртсөн 31 настай эрэгтэйн биеийн байдал хүнд, 3 дугаар зэргийн түлэгдэлтэй аймгийн Нэгдсэн эмнэлэгт хүргэгдсэн байна. Мөн хоёр настай хүүхэд галд өртөж нас барсан тул цогцсыг аймгийн Шүүх шинжилгээний албанд шилжүүлэн өгчээ.
Иргэд та бүхэн галын аюулгүй байдлыг хангаж, болзошгүй аюулаас сэргийлнэ үү.
Эх сурвалж: Онцгой Байдлын Ерөнхий Газар
