Орос орон даяар жил бүрийн тавдугаар сарын 9-ний өдөр Дэлхийн хоёрдугаар дайнд Нацист Германыг ялсны баярыг тэмдэглэж, Москва хотын Улаан талбайд баярын парад зохион байгуулдаг билээ.
Тэгвэл коронавируст халдварын цар тахлын аюулаас сэргийлэх үүднээс Ялалтын 75 жилийн ойн баярын парадыг хойшлуулах шийдвэр гаргаж байгаагаа ОХУ-ын ерөнхийлөгч Владимир Путин мэдэгджээ.
75 жилийн ой тохиож буй арга хэмжээнд дэлхийн улс орнуудын удирдагчид зочлон ирэх төлөвлөгөөтэй байжээ.
Ерөнхийлөгч Владимир Путин тус улсын Аюулгүйн байдлын зөвлөлийн хурлын үеэр “Одоо бид амаргүй сонголттой, шуудхан хэлэхэд, маш хэцүү сонголттой тулгараад байна. Тавдугаар сарын 9-ний өдөр бол бидний хувьд ариун өдөр, харин хүний амь юунаас ч илүү чухал. Халдварын эрсдэл ялалтын баярыг тэмдэглэх боломжгүй болгож байна” хэмээн хэлсэн байна.
Тэрээр "Батлан хамгаалахын яам, хүчний байгууллагуудын дарга нарт, бүх шатны төрийн байгууллагуудын удирдлагуудад хуваарийг өөрчилж, Улаан талбайд, бүс нутгуудад зохион байгуулах цэргийн жагсаалын бэлтгэлийг хойшлуулахыг үүрэг болгож байна" гэжээ.
Ялалтын баярыг хойшлуулах болсон бас нэг шалтгаан нь Дэлхийн Хоёрдугаар дайнд оролцож байсан ахмад дайчид одоо 90-ээс дээш настай хүмүүс байгаа учир тэднийг эрсдэлд оруулахгүйн тулд ийнхүү шийджээ.
Аугаа эх орны ялалтын баярыг цуцлаагүй бөгөөд яг хэзээ тэмдэглэх товыг тогтоогоогүй ч энэ онд багтаан тэмдэгдэх аж.