Гадаад харилцааны сайд Б.Батцэцэг Япон Улсын Гадаад хэргийн сайд Т.Иваяагийн урилгаар энэ сарын 28-наас ирэх сарын 5-ны өдрүүдэд тус улсад албан ёсны айлчлал хийхээр болжээ.
Айлчлалын хүрээнд сайд Б.Батцэцэг Япон Улсын Гадаад хэргийн сайд Т.Иваяатай албан ёсны хэлэлцээ хийхийн зэрэгцээ японы талын албаны бусад төлөөлөгчидтэй уулзалт хийнэ. Талууд хоёр орны "Энх тайван, хөгжил цэцэглэлтийн төлөөх Тусгай стратегийн түншлэл"-ийн хүрээнд харилцаа, хамтын ажиллагааг өргөжүүлэх болон бүс нутаг, олон улсын харилцан сонирхсон асуудлуудаар санал солилцох аж.
Мөн айлчлалын үеэр Монгол Улсад хэрэгжүүлэх Япон Улсын Засгийн газрын буцалтгүй тусламжийн төслүүдийн баримт бичигт гарын үсэг зурахаар төлөвлөж байна.
Энэ удаагийн айлчлал нь Монгол Улсын Гадаад харилцааны сайдын түвшинд Япон Улсын Гадаад хэргийн яамны "хүндэт зочин"-оор 2012 оноос хойш буюу 13 жилийн дараа хэрэгжиж буй айлчлал гэдгээрээ онцлогтой.
Эх сурвалж: Гадаад харилцааны яам
