Эрүүл мэндийн тусламж, үйлчилгээний чанар, хүртээмжийг сайжруулах, төвлөрлийг сааруулж, дэвшилтэт арга технологийг орон нутагт нэвтрүүлэх зорилгоор Гэмтэл согог судлалын үндэсний төвийн (ГССҮТ) баг бүрэлдэхүүн 2025 оны гуравдугаар сарын 31-нээс дөрөвдүгээр сарын 1-ний өдрүүдэд Сэлэнгэ, Баянхонгор аймагт "Гэмтлийн үеийн яаралтай тусламж" сэдэвт онол, дадлага хосолсон сургалтыг амжилттай зохион байгууллаа.
Сэлэнгэ аймагт зохион байгуулсан сургалтын хүрээнд тус аймгийн Нэгдсэн эмнэлгийн гэмтлийн тусламж, үйлчилгээний өнөөгийн байдалд үнэлгээ дүгнэлт хийж, осол гэмтлийн үед хэрхэн шуурхай, зөв арга хэмжээ авах талаар сургалт явуулсан байна. Энэ удаагийн сургалтад Сэлэнгэ аймгийн өрх, сум, тосгоны эрүүл мэндийн төвүүдээс нийт 35 эмч, эмнэлгийн мэргэжилтэн хамрагджээ.
Харин Баянхонгор аймагт болсон сургалтыг тус аймгийн Засаг даргын Тамгын газартай хамтран зохион байгуулсан бөгөөд сургалтад Онцгой байдлын газар, Цагдаагийн газар, Боловсролын байгууллагын 47 ажилтан, албан хаагч оролцсон байна. Мөн Эрүүл мэндийн газар, Нэгдсэн эмнэлэг, сум, өрхийн эрүүл мэндийн төвийн 207 эмч, эмнэлгийн мэргэжилтэнд чиглэсэн мэдээлэл, зөвлөмжийг хүргэж, гамшиг, ослын үед үзүүлэх анхан шатны тусламжийн чадавхыг нэмэгдүүлэх зорилготой ажилласан байна.
Энэхүү сургалт нь орон нутгийн түвшинд лавлагаа шатлалын эмнэлгийн жишиг аргачлалыг нутагшуулах, тусламж үйлчилгээний хариу арга хэмжээний хугацааг богиносгох чухал алхам болж байгааг ГССҮТ-өөс онцолсон юм.
Эх сурвалж: Гэмтэл согог судлалын үндэсний төв
