Нүүрсний хулгайн хэрэгт шууд болон шууд бусаар холбогдсон 17 хүний нэрийг өчигдөр АТГ-аас зарласан билээ.

Уг хэрэгт холбогдсон УИХ-ын гишүүнээр ажиллаж буй таван гишүүн болох Н.Наранбаатар, Ш.Раднаасэд, Б.Баттөмөр, Ц.Анандбазар, Ц.Сэргэлэн нар мэдээлэл хийлээ. Тэд Авлигалтай тэмцэх газарт асуулт тавьж, тодруулга авах талаараа мэдэгдэв.

Энэ үеэр УИХ-ын гишүүн Ц.Сэргэлэн "Надад нүүрстэй холбоотой ямар ч асуудал байхгүй. Би ямар нэг хууль зөрчөөгүй. Би хуулийн байгууллагад хандаж, нэр төрөө сэргээлгэнэ. Сэргээлгэхдээ би нэр төрөө үнэлнэ. Тэр үнэлсэн мөнгөөр ядарсан иргэддээ гэр авч өгнө. Надаас гэр хүсдэг иргэд маш олон байдаг. Би тэр асуудлыг нь шийдэж чадахгүй, “Надад боломж алга аа“ гээд явж ирсэн. Намайг харлуулах зорилготой нэг нөхөр гүйгээд байгаа. Цаг нь болохоор нэрийг нь зарлана" гэлээ.