Нийслэлийн 385 жил, Нийслэл Хүрээг “Улаанбаатар хот” хэмээн нэрийдсэний 100 жилийн ойд зориулан Нийслэлийн Засаг даргын Тамгын газар болон нийслэлийн Архивын газраас “Улаанбаатар хот-100” архивын баримт, биет үзмэрийн үзэсгэлэнг Монголын үндэсний музейн танхимд олон нийтэд дэлгэлээ.

Өчигдөр нээлтээ хийсэн, долоо хоног үргэлжлэх үзэсгэлэнд 1924 онд хотын захиргаа байгуулагдсантай холбогдох архивын баримтууд голлосон бөгөөд анхны хурлын дарга, анхны хотын дарга томилогдсон үеийн түүхэн баримтууд болон Монголын үндэсний музей, Улаанбаатар хотын музейн сан хөмрөгт хадгалж буй 100 гаруй биет үзмэр, эд өлгийн зүйлсийг олон нийтэд дэлгэн үзүүлж байна.

1639 онд Халхын Түшээт хан аймгийн Түшээт ханы хошууны нутаг, одоогийн Өвөрхангай аймгийн Бүрд сумын Ширээт Цагаан нуур хэмээх газарт Чингис хааны алтан ургийн хойчис Халхын Түшээт хан Гомбодоржийн хөвгүүн Занабазарыг анхдугаар Богдоор өргөмжлөн төрийн их ёслол үйлдэж, түүнд зориулж Орд өргөөг байгуулснаар Монгол Улсын нийслэл үүсгэн байгуулсан гэж үздэг. Улмаар 1912 онд Богд хаан Их хүрээг “Нийслэл Хүрээ” хэмээн зарлиг буулгасан бөгөөд 1924 оны арваннэгдүгээр срын 26-нд Улсын анхдугаар их хурлын 14 дүгээр тогтоолоор Нийслэл хүрээг “Улаанбаатар” хэмээн нэрийдсэн билээ.