"Centеrra Gold" компани Монгол дахь бизнесээ бусдад худалдсан тухайгаа өнгөрөгч баасан гаригт албан ёсоор мэдээлсэн. Тэд Бороогийн алтны уурхай, Гацуурт төслөө нийтэд нь 35 сая ам.доллараар үнэлэн Сингапурт бүртгэлтэй OZD ASIA PTE компанид худалдсан гэв.
"Centеrra Gold" компани Гацууртын алтны ордын ашиглалтын тусгай зөвшөөрлийг цуцлуулахаар тэмцсэн "Ноён уулаа аврах хөдөлгөөн" ТББ-тай гурван жил гаруй хугацаанд шүүхдэлцэж, 30 гаруй удаагийн шүүх хурал болсны эцэст тус компани Монголын уул уурхайгаас гарч байна.
Албан бус мэдээллээр OZD ASIA PTE-ийн Монгол дахь захирлаар Эрдэнэбаатарын Дөлгөөн гэх монгол залуу ажиллаж байна. Э.Дөлгөөн өмнө нь Н.Алтанхуягийг Ерөнхий сайд байх үед гадаад бодлогын зөвлөхөөр нь ажиллаж байжээ. Н.Алтанхуягийн Засгийн газар огцорсны дараа Улаанбаатар хотын банканд нэг хэсэг ажиллаж байсан гэх. Э.Дөлгөөн нь Блүүмбэрг телевизийн Монгол дахь салбарын захирал Э.Долгионы төрсөн дүү бөгөөд хэвлэлийн салбарт ажиллаж байсан туршлагатай.
OZD ASIA нь Австралид төвтэй OZD Capital-ийн охин компани бөгөөд хөрөнгө оруулагчид нь Австрали, Сингапурын иргэд юм байна. Тус компани "Centerra Gold"-ийн охин компани болох "Centerra Netherlands"-ийн бүх хувьцаа, компанитай холбоотой өр авлагыг ч мөн худалдан авчээ.
Энэ тухай "Centerra Gold" компанийн гүйцэтгэх захирал Скотт Перри "Монгол дахь бизнесээ зарсан нь бидэнд Турк, Канадын төсөлдөө голчлон анхаарах боломж олгож байна" хэмээн мэдэгджээ.
