УИХ-ын гишүүн Д.Гантулгын бүрэн эрхийг түдгэлзүүлэх асуудлыг УИХ-ын Төрийн байгуулалтын байнгын хороо дэмжлээ. УИХ-ын гишүүн Д.Гантулга энэ үеэр “Шүүх шинжилгээний  байгууллага гурав, дөрвөн удаа янз бүрийн дүгнэлтүүд гаргасан. Энэ болгоноос зөвхөн намайг буруутгах бололцоотой бүхнийг авч  хавтаст хэрэг нээсэн. Маш харамсалтай байна. Гантулга миний нэр төр, алдар хүндэд  зохион байгуулалттайгаар халдах, зохион байгуулалтайгаар заналхийлэх дарамтлах ажиллагаа явагдсан. Энэ бүгдийг би нотлохын тулд аль болох мэдээлэл, баримтуудыг гаргаж өдий  хүртэл явж байна. Тиймээс хуулийн байгууллагаар шалгуулж үнэн мөнөө тогтоолгоно” гэв. УИХ-ын гишүүн Д.Гантулгн бүрэн эрхийг түдгэлзүүлэх эсэхээр санал хураахад байнгын хорооны найман гишүүн (61,5 хувь) дэмжлээ.

Харин УИХ-ын гишүүн Д.Муратыг  бүрэн эрхийг түдгэлзүүлэх асуудлыг байнгын хороо дэмжсэнгүй. Улсын Ерөнхий прокурор М.Энх-Амгалан хариултдаа Д.Мурат гишүүний холбогдоод буй хэргийн тухай “Яллагдагч, хохирогч хоёр нэлээн удаан хугацаанд хувийн харилцаатай байсан. Хувийн тааламжгүй харилцаа үүссэнээс ийм асуудалд хүрсэн. Хөнгөн гэмт хэрэг гэдэг нь шүүх эмнэлгийн хоёр удаагийн дүгнэлтээр тогтоогдсон” гэв. Санал хураалтыг нууцаар явуулахад Байнгын хорооны 13 гишүүнээс найм нь татгалзсан байна.

Гэвч УИХ-ын эмэгтэй гишүүдийн бүлгээс сэтгүүлчдэд мэдээлэл хийж, “Д.Гантулга, Д.Мурат нарын бүрэн эрхийг хамтад нь түдгэлзүүлэх ёстой. Хууль бүх хүнд тэгш шударгаар үйлчлэх ёстой” гэв.

Б.ЗАЯА