2025 оны хоёрдугаар сарын 15-16-ны өдрүүдэд “Скайрезорт” цанын баазад “Улаанбаатар” өвлийн наадам зохион байгуулагдах гэж байна. Энэхүү наадам нь Монгол орны өвлийн үзэсгэлэнт байгаль, ёс заншил, өв уламжлал болон өвөрмөц соёлыг олон нийтэд сурталчлан таниулах, мөн залуу үедээ өвлүүлэн үлдээх зорилготой юм.
Наадмын хүрээнд өвлийн улирлын экстрим спорт, аяллын төрөл, сонирхолтой үйл ажиллагаануудыг зохион байгуулж, нийслэлчүүд болон зочдод өвлийг бүтээлч, аз жаргалтай өнгөрүүлэх боломжийг олгохыг зорьж байна. Мөн Нийслэлийн Аялал жуулчлалын газраас гэр бүл, найз нөхдөөрөө хамтдаа амралтын өдрийг хөгжилтэй, дурсамжтай өнгөрүүлэхийг уриалжээ.
“Улаанбаатар” өвлийн наадам нь өвлийн аялал жуулчлалыг хөгжүүлэх, залуучуудын сонирхлыг татах, өвлийн спортод дуртай хүмүүст тохирсон үйл ажиллагаа зохион байгуулах замаар нийслэлийн соёл, аялал жуулчлалын цар хүрээг өргөжүүлэхэд чухал ач холбогдолтой юм.
Эх сурвалж: Нийслэлийн Аялал жуулчлалын газар.
