Зам тээврийн сайд Б.Дэлгэрсайхан Монгол Улс, Бүгд Найрамдах Ардчилсан Лаос улсын Худалдаа, эдийн засаг, шинжлэх ухаан техникийн хамтын ажиллагааны Засгийн газар хоорондын комиссын энэ сарын 24-2-нд зохион байгуулж буй ээлжит XII хуралдаанд оролцож байна.

Айлчлалын хүрээнд Зам, тээврийн сайд Б.Дэлгэрсайхан Лаосын “Таналенг” хуурай боомтын үйл ажиллагаатай танилцаж, туршлага солилцжээ. Энэ боомт нь Лаос улсын нэгдүгээр зэрэглэлийн хуурай боомт бөгөөд НҮБ-ын АНДЭЗНК-ийн хуурай боомтын тухай Засгийн газар хоорондын хэлэлцээрээр батлагдсан олон улсын ач холбогдол бүхий есөн хуурай боомтын нэг юм.

Монгол Улс Хуурай боомтын хэлэлцээрт 2013 онд гарын үсэг зурж, УИХ-аар Хуурай боомтын хэлэлцээрийг 2016 онд соёрхон баталж, Алтанбулаг, Улаанбаатар, Сайншанд, Замын-Үүд, Чойбалсан, Ховд, Цагааннуурыг хуурай боомт гэж тусгажээ. Засгийн газрын 2024 оны тогтоолоор Дорноговь аймгийн Замын-Үүд сумын нутаг дэвсгэр дэх “Бүс нутгийн логистикийн төв”-ийг түшиглэн олон улсын чанартай Замын-Үүд хуурай боомт байгуулахаар шийдсэний дагуу яамны дэргэд Далайн захиргааны бүтцэд хуурай боомтын асуудал хариуцсан бүтэц байгуулаад байгаа.

Манай улс далайд гарцгүй орны хувьд хуурай боомт байгуулах нь худалдаа, тээврийг хөнгөвчлөх, тарифын, тарифын бус хориг саадыг арилгах, тээвэрлэх хугацаа, өртгийг багасгах, хөрш улстай олон боомт гарцаар холбогдох, чөлөөтэй дамжин өнгөрөх нөхцөл боломж бүрдүүлэх, чингэлэг тээврийн хүлээгдлийг арилгах зэрэг логистикийн төвийн үйл ажиллагааг сайжруулснаар тээврийн зардал багасаж, эдийн засгийн үр ашиг нэмэгдэх олон талын тооцоо судалгааг гаргаад байгааг ЗТЯ мэдээллээ.