Италийн “Prada” загварын ордон болон Техасын “Axiom Space” гарааны компани 2026 онд хэрэгжүүлэх НАСА-гийн "Artemis III" хөтөлбөрийн хүрээнд Сар руу нисэх сансрын нисгэгчдийн шинэ хувцсыг хамтран зохион бүтээснээ танилцуулжээ.
"Axiom Extravehicular Mobility Unit" (AxEMU) хэмээн нэрлэсэн шинэ хувцсыг Милан хотноо болсон Олон улсын сансрын нисгэгчдийн их хурлын үеэр танилцуулжээ. Энэхүү хувцсыг зохион бүтээхдээ Сарны хүнд нөхцөлд ажиллахад зориулагдсан өндөр технологийн давуу тал, гоо зүйн элементүүдийг хослуулсан гэж “Prada” болон “Axiom Space”-ийн хамтарсан мэдэгдэлд дурдсан байна.
Сансрын нисгэгчдийн шинэ хувцсыг Сарны өмнөд туйлын эрс тэс температурыг тэсвэрлэх, мөн Сарны байнгын харанхуй хэсгүүдийн хэт хүйтнийг доод тал нь хоёр цаг тэсвэрлэж чадахуйц дулаан хадгалагч материалаар хийжээ. "AxEMU"-ийг хэдийнэ туршиж эхэлсэн бөгөөд зохион бүтээх үйл явц дуусах шатандаа орсон гэдгийг мэдэгдэлд дурдсан байна.
“Artemis III” бол 1972 онд “Аполлон-17” хөтөлбөрийг хэрэгжүүлж дууссанаас хойш анх удаа Саран дээр сансрын нисгэгчдийг буулгах зорилготой хөтөлбөр юм.
