Боловсролын Үнэлгээний Төв(БҮТ)-ийн Фэйсбүүк дэх албан ёсны цахим хуудсанд өнөөдөр өглөө 2024 оны Элсэлтийн Ерөнхий Шалгалт(ЭЕШ)-ын бүртгэл эхэлж байгаа тухай мэдээлэл орсон боловч төд удалгүй устгагджээ. Мөн бүртгэл 2024 оны хоёрдугаар сарын 19-ний 09:00 цагт эхэлнэ гэсэн байна.
БҮТ-ийн захирал Л.Ганбат энэ тухай "ЭЕШ-ын бүртгэл өнөөдөр эхлэхээр байсан ч даваа гаригийн 09:00 цаг хүртэл хойшлуулсан. Бид даваа гаригт ЭЕШ-ын бүртгэлийн талаар хэвлэлийн хурал хийж, мэдээлэл хүргэх болно" гэх мэдээллийг өглөө.
Бүртгэлийг https://eyesh.eec.mn/ цахим хуудсаар явуулна.
Шалгуулагчид ЭЕШ-д бүртгүүлэхдээ:
- Зөвхөн өөрийн и-мэйл хаягийг ашиглана.
- ЭЕШ-д монгол хэл, англи хэл, орос хэл, математик, физик, хими, биологи, газар зүй, монгол улсын түүх, нийгэм судлал хичээлээс 2-оос багагүйг сонгож бүртгүүлнэ.
- ЭЕШ-ын бүртгэлийн хугацаанд шалгалт өгөх хичээлээ сонгож төлбөрөө төлсөн байна. Төлбөр төлөгдөөгүй тохиолдолд бүртгэл баталгаажихгүй.
- Хөгжлийн бэрхшээлтэй болон тусгай сургуулийн суралцагчид ЭЕШ-д бүртгүүлсэн бол холбогдох бичиг баримт (өргөдөл, эмчийн магадалгаа, сургуулийн тодорхойлолт)-ыг бүртгэлийн хугацаанд Боловсролын Үнэлгээний Төв(БҮТ)-д ирүүлнэ.
ЭЕШ-ын бүртгэлтэй холбоотой мэдээлэл, жишиг даалгавар, теле хичээлийг БҮТ-ийн цахим зөвлөх help.eec.mn хуудаснаас авах боломжтой. Мөн лавлах утас 7011-9498 утсанд хандаарай.
Эх сурвалж: Боловсролын Үнэлгээний Төв
