Нийслэлийн эрүүл мэндийн газрын дарга Л.Төмөрбаатар үүрэгт ажлаасаа чөлөөлөгдөх хүсэлт гаргасныг хотын дарга хүлээн авч, захирамж гаргажээ.
Нэгдүгээр төрөх эмнэлэгт амаржсан эхийг коронавирусийн халдвартай нь батлагдсаны дараа ХӨСҮТ рүү шилжүүлэхдээ хүнлэг бус үйлдэл гаргаж гадуур хувцас өмсүүлэлгүй, халаад, углааштай, амыг нь дэрээр халхалсан байсан нь иргэдийн бухимдлыг дагуулсан.
"Өргөө" амаржих газар засаг захиргааны нэгжийн хувьд нийслэлийн харьяа байгууллага учраас Нийслэлийн Засаг дарга бөгөөд Улаанбаатар хотын захирагчид Эрүүл мэндийн сайдын зүгээс НЭМГ-ын удирдлага болон "Өргөө" амаржих газрын удирдлагад хариуцлага тооцох талаар албан тоотыг хүргүүлсэн талаар мэдээлж байсан билээ.
Хотын даргын Д.Сумъяабазрын захирамжыг хүргэж байна.
Мөн НЭМГ-ын дэд дарга Л.Зэндмаа тушаал гаргаж, Нэгдүгээр төрөх "Өргөө" амаржих газрын дарга Г.Баясгаланг албан тушаалаас чөлөөлсөн байна.
