Нийслэлийн Сүхбаатар дүүргийн Ерөнхий боловсролын 2 дугаар сургуулийн удирдлага, багш, сурагчдын төлөөлөл уламжлал ёсоор Цагаан сарын шинийн наймны өдөр Монгол Улсын Үндэсний номын санд 108 баринтаг өргөлөө.

Тус сургуулийн багш, сурагчид 2008 оноос эхлэн жил бүр 108 баринтаг урлаж, Үндэсний номын сангийн хуучин судар номын хадгалалт, хамгаалалтыг сайжруулах, бичиг номоо дээдлэх, ёс уламжлалаа эрхэмлэх үзлийг хүүхэд багачуудад төлөвшүүлэх зорилгоор өргөсөөр иржээ.

Энэ жилийн баринтгийг тус сургуулийн захирал, доктор Л.Цэнгэлмаа, багш Н.Энхцэцэг, 12Б ангийн сурагч Э.Цэлмэг, М.Эгшиглэн, Б.Цолмон нар нийгмийн ажилтнууд болон нарийн бичгийн даргын хамт Үндэсний номын сангийн хамт олонд гардуулан өгсөн байна.

Сурагчид өөрсдийн урласан баринтгаас дээжлэн судар ном боож, Үнэт ховор номын музейг үзэж сонирхон, номын өв соёлтой танилцжээ.