Хүнс, хөдөө аж ахуй, хөнгөн үйлдвэрийн яам (ХХААХҮЯ)-наас мэдээлснээр, 2024-2025 оны ургац хураалтаар дотоодын хэрэгцээг бүрэн хангах хэмжээний улаан буудай хураан авсан байна. Энэ нь өмнөх онтой харьцуулахад 32 хувиар өссөн үзүүлэлт бөгөөд гурилын үйлдвэрүүдийн түүхий эдийн хангамж тогтвортой байх нөхцөлийг бүрдүүлж байна.

Дотоодын ургацаар төмсний хэрэгцээг 100 хувь, хүнсний ногооны 85 хувийг хангах боломжтой болсон бөгөөд энэ нь хүнсний аюулгүй байдалд чухал хувь нэмэр оруулж байгаа юм. Түүнчлэн, хадгалалтын нөхцөлийг хянах, ургацын чанарыг баталгаажуулах ажлыг зохион байгуулж, үйлдвэрлэлийн тасралтгүй үйл ажиллагааг хангахад анхаарч байна.

ХХААХҮЯ цаашид хүнсний хангамжийг нэмэгдүүлэхэд чиглэсэн хөрөнгө оруулалтыг үе шаттайгаар шийдвэрлэх, хүнсний аюулгүй байдлыг баталгаажуулах эрх зүйн орчныг сайжруулах арга хэмжээг хэрэгжүүлэхээр төлөвлөж байна.

Эх сурвалж: Хүнс, хөдөө аж ахуй, хөнгөн үйлдвэрийн яам