Японы автомашин үйлдвэрлэлийн томоохон компани болох Toyota 2015 оноос хойш Олон Улсын Олимпын Хорооны албан ёсны түншээр ажиллажээ. Гэсэн хэдий ч Toyota компанийн удирдлагууд "Парис 2024" олимпын дараа гэрээгээ шинэчлэхгүй гэдгээ мэдэгдсэн байна. Тус компани цаашид зөвхөн Олон Улсын Паралимпын Холбоо (ОУПХ)-г ивээн тэтгэх төлөвлөгөөтэй байгаа аж.

Toyota компанийн зүгээс сүүлийн дөрвөн олимпод нийт 100 тэрбум иен буюу ойролцоогоор 637 сая ам.доллар зарцуулсан байна. Гэрээгээ шинэчлэхгүй болсон гол шалтгаан нь ОУОХ-ны тамирчдын талаарх бодлого, гэрээний дагуу олгосон мөнгөний зарцуулалтад сэтгэл хангалуун бус байгаа гэж шинжээчид үзжээ.

Хамгийн сүүлд "Токио 2020" олимпын үеэр иргэдийн эсэргүүцэлтэй тулгарснаас шалтгаалан Япон дахь сурталчилгаагаа зогсоож байв. Мөн олимпын үеэр ивээн тэтгэгч, гэрээний шагналын мөнгө, санхүүтэй холбоотой авлигын дуулиан тасраагүй юм.

Эх сурвалж: Inside The Games