Халдварт өвчин судлалын үндэсний төвөөс мэдээлснээр, улаанбурхан өвчний тархалт нэмэгдэж байгаа нь эрүүл мэндийн салбарын анхаарлын төвд байна. Өнөөдрийн байдлаар лабораториор батлагдсан 590 тохиолдол бүртгэгдээд байгаа бөгөөд тэдгээрээс 90 хүн эмнэлэгт хэвтэн эмчлүүлж, 7 хүн гэрээр хяналтад орон эмчилгээ авч байна. Түүнчлэн сэжигтэй тохиолдол 38, хавьтал болсон иргэдийн тоо 11,539-д хүрээд байгаа юм.

Улаанбурхан нь амьсгалын замаар дамжин халдварладаг, өндөр халдварлалттай өвчин бөгөөд хүүхдүүд, ялангуяа Ерөнхий боловсролын сургуулийн сурагчдын дунд голомтлон гарч буй нь тус өвчний нөхцөл байдалд ноцтой хандуулах шалтгаан болж байна. Вирусийн тархалтыг хянах, олон нийтийг өвчлөлөөс сэргийлэх үндсэн арга нь вакцинжуулалт бөгөөд улаанбурханы эсрэг дархлаажуулалт нь халдварын тархалтыг хязгаарлах үр дүнтэй арга болохыг мэргэжлийн байгууллагууд онцолжээ.

Иймд ХӨСҮТ-өөс халдварын голомттой бүсэд сурч, ажиллаж байгаа хүүхэд болон насанд хүрэгчдийг улаанбурханы эсрэг вакцинд яаралтай хамрагдахыг уриалж, өвчнөөс сэргийлэх, нийгмийн эрүүл мэндийг хамгаалах хамтын үүрэгт идэвхтэй оролцохыг анхааруулж байна.

Эх сурвалж: Халдварт өвчин судлалын үндэсний төв