Германы хөл бөмбөгийн шигшээ багийн 44 дугаартай футболкийг хөгжөөн дэмжигчдэд худалдахгүй гэдгээ Adidas компани мэдэгджээ. Учир нь, хоёр тооны хослол ба шрифт нь нацистуудын СС цэрэгжсэн отрядуудын бэлгэдэлтэй төстэй байгааг зарим хэвлэлүүд шүүмжилсэн байна.

Adidas-ын төлөөлөгч Оливер Брюгген энэ тухай "Ийм дугаартай футболкийг цаашид худалдахгүй бөгөөд хэрвээ нацистуудын бэлгэдэлтэй төстэй байгаа бол энэ нь санаатайгаар хийсэн зүйл биш, санамсаргүй тохиолдол" гэв. Мөн уг шрифтийн эх загварыг Германы хөл бөмбөгийн холбоо, түүний түнш байгууллагууд хамтран зохиосон болохыг мэдэгдсэн байна.

Германы шигшээгийн өмсгөлийн эх загварыг УЕФА-д хүргүүлсэн бөгөөд нацистуудын бэлгэ тэмдэгтэй төстэй байгаа тухай хэн ч яриагүй гэдгийг Германы хөл бөмбөгийн холбоо Х нийгмийн сүлжээн дэх хуудсандаа мэдэгдсэн байна. Үүний сацуу тус холбоо 44 дугаарыг өөр шинэ шрифтээр хэвлэхээр шийдвэрлэжээ.

Уг дугаарын шрифт нь СС-ийн бэлгэдэлтэй төстэй байгааг түүхч Михаэл Кёниг эхэлж анзаарсан байна. Шрифтийн иймэрхүү загвар нь түүхийн үүднээс томоохон асуудал үүсгэнэ, тэр тусмаа Европын аварга шалгаруулах тэмцээн болох гэж буй энэ үед бүр ч ноцтой гэдгийг түүхч сануулжээ.  

СС-ийн энэхүү бэлгэдлийг 1929 онд зохиож, нацистуудын цэрэгжүүлсэн бүлгүүд хэрэглэж байв. Хожим нь дэлхийн II дайны үед СС-ийн отрядууд олон гэмт хэрэг үйлдсэний дотор бөөнөөр хорих лагериудад еврейчүүдийг үй олноор нь хядахад оролцсон юм.   

Германы шигшээгийн хувцас бас нэгэн шүүмжлэл дагуулж байгаа нь, тус багийнхан бусад багийн талбайд зочлон тоглохдоо тод ягаан өнгийн өмсгөл өмсдөг явдал юм. Үүнийг “Германы хөл бөмбөгийн холбоо санхүүжилт татах гэсэн нэгэн арга” гэж шүүмжилдэг хүмүүс бий.

Adidas компани 1950-иад оноос хойш Германы хөл бөмбөгийн шигшээ багийн өмсгөлийг үйлдвэрлэж байгаа юм. Харин Германы хөл бөмбөгийн холбоо 1927 оноос Adidas-аас татгалзаж, Америкийн Nike компанийн өмсгөлийг худалдан авахаар шийдвэрлэснийг Эдийн засгийн сайд Р.Хабек “эх оронч бус үйлдэл” гэж шүүмжилжээ.