НӨАТ-ын буцаан олголт өнөөдрөөс эхэлж иргэдийн дансанд орж эхэллээ. Иргэд буцаан олголтоор нийт 148  тэрбум төгрөгийг авах юм.

Сангийн сайд Ч.Хүрэлбаатар энэ талаар мэдээлэл хийхдээ "Засгийн газрын хуралдаанаар 2019 оны НӨАТ-ыг үндэслээд ард иргэдэд 20 хувийг буцаан олгох шийдвэр гарч байна.

НӨАТ-ын буцаан олголтоор 148 тэрбум төгрөгийг ард иргэд буцаан авна. Энэ нь өнгөрсөн жилтэй харьцуулахад 26 тэрбум төгрөгөөр нэмэгдсэн. 

Хоёрдугаарт, 912 мянган иргэн буцаан олголт авч байгаа бөгөөд өнгөрсөн жил 796 мянган иргэн авч байсан. Татварын багц хуультай холбоотойгоор энэ жилээс улирал бүрт буцаан олголтыг олгож эхэлнэ. Дөрөвдүгээр сар, долдугаар сар, аравдугаар сард НӨАТ-ын буцаан олголтыг иргэдийн дансанд шилжүүлнэ” гэдгийг хэлж байсан юм.

Улсын төсөвт 2019 онд НӨАТ-ын төрлөөр төвлөрүүлсэн татварын орлогыг өнгөрсөн оны мөн үетэй харьцуулахад 189.9 тэрбум төгрөг буюу 21.1 хувиар, 2016 онтой харьцуулахад 530 тэрбум төгрөг буюу 94.3 хувиар нэмэгджээ.