Жүжигчин Галь Гадот өөрийн Instagram хуудсаараа дамжуулан "Wonder Woman 1984" киноны зураг авалт хийгдэж дууссаныг мэдэгдлээ.
Тэрээр "Бид үүнийг дахин хийж чадлаа! Wonder Woman-ы эхний ангийн зураг авалт гайхалтай байсан ч энэ удаад бүр илүү онцгой болсон. Бид гурван улсын дөрвөн өөр байршилд зураг авалтыг хийсэн. Өдөр бүр зураг авалтын талбайд ирж, энэ кинонд бүх зүрх сэтгэлээ шингээсэн зураг авалтын багийн 1,000 гишүүн бүрээр би маш их бахархаж байна" хэмээн бичжээ.
Одоогийн байдлаар кинонд яг юуны тухай өгүүлэх нь нууц байгаа ч үйл явдал 1980-аад онд Хүйтэн дайны үед өрнөнө гэдэг нь тодорхой болсон байгаа. Мөн Wonder Woman энэ удаад "Cheetah" хочит хорон санаат бүсгүйтэй тэмцэх болно.
DC Comics-ын алдарт эмэгтэй супер баатрын тухай "Wonder Woman" киноны эхний анги 2017 онд нээлтээ хийж, дэлхийн кино театруудаас нийт 821 сая ам.долларын орлого олж байсан билээ.
Энэхүү асар амжилттай төслийн дараагийн анги болох "Wonder Woman 1984" кино 2020 оны зургаадугаар сарын 5-нд нээлтээ хийхээр төлөвлөгдсөн байна.
