Засгийн газраас 2025 оныг “Нийслэлийн дэд бүтцийн хөгжлийг дэмжих жил” болгон зарлаж, Улаанбаатар хотын агаарын бохирдлыг бууруулах, дэд бүтцийн бүтээн байгуулалтын төслүүдийг хэрэгжүүлэхэд дэмжлэг үзүүлэх зорилгоор Ерөнхий сайдын дэргэд Шуурхай штаб байгууллаа.
Тус штабын хуралдаан бямба гариг бүр зохион байгуулагдах бөгөөд хурлын үеэр өгсөн үүрэг даалгавруудыг Засгийн газрын хуралдаан бүрд танилцуулж хэлэлцүүлж байна. Шуурхай штабын дөрөвдүгээр хуралдааны талаар ЗГХЭГ-ын дарга Н.Учрал Засгийн газрын гишүүдэд танилцуулж, Ерөнхий сайдаас өгсөн шуурхай үүрэг даалгавар, түүний хэрэгжилтийн тайланг системд бүртгэх, хэрэгжилтэд хяналт тавихыг холбогдох албан тушаалтнуудад үүрэг болголоо.
Дөрөвдүгээр хуралдаан хоёрдугаар сарын 1-ний бямба гарагт болж, өмнөх хуралдаанаас өгсөн үүрэг даалгаврын биелэлт, Багахангай-Хөшигийн хөндий чиглэлийн салбар төмөр замын төсөл, нийслэлийн зах, худалдааны төвүүдийг Улаанбаатар хотоос нүүлгэн шилжүүлэх ажил, Улаанбаатар хотын 2030 ерөнхий төлөвлөгөө, нийслэлийн эрчим хүчний чадлын дутагдал болон шугам сүлжээний тулгамдсан асуудал, хиймэл оюун ухаан ашиглан илрүүлэлт хийх, камерын бүртгэлийн системийн хяналт, нийтийн тээврийн хяналт, Хүннү хотын төлөвлөлт, гэр хорооллын халаалтыг сэргээгдэх эрчим хүчээр хангах загвар төслийн талаар хэлэлцсэн талаар ЗГХМОНХГ-аас мэдээллээ.
Эх сурвалж: Засгийн газрын хэвлэл мэдээлэл, олон нийттэй харилцах газар
