Монгол Улсын Шадар сайд Т.Доржханд энэ сарын 21-25-ны өдрүүдэд Швейцарын Давос хотноо зохион байгуулагдаж буй Дэлхийн эдийн засгийн 55 дугаар чуулганд оролцож байна.
Энэхүү чуулган нь дэлхийн улс төр, эдийн засаг, нийгмийн тулгамдсан асуудлуудыг хэлэлцэх, шийдлийн гарцыг тодорхойлохоор дэлхийн удирдагчид, бизнес эрхлэгчид, шинжээчдийг нэг дор цуглуулдаг онцгой арга хэмжээ юм.
Шадар сайд Т.Доржханд чуулганы хүрээнд дэлхийн эдийн засгийн нөхцөл байдал, уур амьсгалын өөрчлөлт, технологийн хөгжил, эрчим хүчний шилжилт зэрэг сэдвүүдээр хэлэлцүүлэгт оролцож, Монгол Улсын байр суурийг илэрхийлэхийн зэрэгцээ хоёр талт уулзалтууд хийж байна.
Тэрбээр Монгол Улсын хөгжлийн стратеги, хөрөнгө оруулалтын боломжууд, ногоон эдийн засгийн шилжилтийн талаар мэдээлэл өгөх, олон улсын хамтын ажиллагааг өргөжүүлэхэд анхаарч ажиллаж буйгаа онцоллоо.
Давосын чуулган нь Монгол Улсын олон улсын хамтын ажиллагааг бэхжүүлэх, гадаадын хөрөнгө оруулалтыг татах, дэлхийд өрсөлдөх боломжийг нэмэгдүүлэх чухал платформ болж байгааг Шадар сайд онцолжээ.
