Эдийн засагч Б.Лхагважав News.mn сайтад өгсөн ярилцлагадаа "МАН өрмийг нь хамж, АН-д хусмыг нь долоолгож байна" гэсэн нь манай өнөөгийн улс төрийн нөхцөл байдалтай тун ч дүйсэн зүйрлэл болов. Энэ зөвхөн эдийн засгийн хувьд биш, эрх мэдлийн хувьд өгсөн үнэлэлт юм.

Хэдийгээр АН-ын сайд нар эдийн засгийн бодлогоо хэрэгжүүлэхээр болж Засгийн газарт найман суудал эзэлсэн авч тэдэнд эрх мэдлийн үртэс ч алга. Энэ нь сая болсон төсвийн хэлэцүүлэг дээр бүр ч тодорхой харагдлаа. Ерөнхий сайд танхимынхаа гишүүдийг аваад Шанхайн экспод явсан хойгуур төсвийн гурав дахь хэлэлцүүлэг дээр АН-ын сайд нараас нэг нь ч байсангүй. Түүнийхээ оронд үзэсгэлэн хэсч, үйлдвэрүүдээр зочилж, Ерөнхий сайдын ард фон хийж яваад л ирлээ.

Төсвийн ерөнхийлөн захирагч нар нь эзгүй хойгуур болсон төсвийн гурав дахь хэлэлцүүлэг жинхэнээсээ "бантан" болоод дуусав. Тэргүүн шадар сайд Л.Гантөмөрийн хэлснээр өмнөх баасан гаригийн (2024.11.01) чуулганы хуралдаанаас оруулж ирсэн төсөв дээр таналт хийхээр УИХ-аас ажлын хэсэг гаргахаар болсон авч УИХ-ын дарга ажлын хэсгийг байгуулсангүй. 

Намын дарга Л.Гантөмөр "Төсөв тэлсэн нь үнэн, хэмнэлт хийх нь зайлшгүй" гэдэг саналыг хэлсэн авч санал хураалт болоход АН-ын гишүүд 35,6 их наядын зарлагатай төсвийн төслийг дэмжиж санал өглөө. Засагт орсон сайд нар нь бүлгийнхээ гишүүдтэй тулж ажилласнаар Засгийн газраас оруулж ирсэн төсөл тэр хэвээрээ батлагдлаа.

Үндсэндээ АН-аас томилогдсон сайд нарын хувьд төсөв бүрдүүлэх л үүрэг хүлээж байгаагаас биш түүний зарцуулалт дээр хяналт тавих ямар ч эрх мэдэлгүй байна. Бүрдүүлсэн төсвийг захиран зарцуулах эрх мэдэл нь зөвхөн МАН-ын дарга, гишүүд, сайд нарт оногдож байна. АН-ын сайд нар аль болтол МАН-ын "панчаан" хийх вэ?