УИХ-ын үдээс өмнөх чуулганы үеэр ЗГХЭГ-ын дарга Н.Учрал гишүүн Б.Уянгын асуултад хариулахдаа дараах тоо баримтыг онцоллоо.
Н.Учрал:
-Өнөөдрийн байдлаар төрийн өмчит 98-99 компани, хуулийн этгээд бий гэсэн статистик байна. Энэ 99 компанийн хөрөнгө бараг 64 их наяд төгрөгт хүрсэн. Манай улсын ДНБ-тэй дүйцэж байна. Улсаараа үйлдвэрлэсэн, худалдсан, үйлчилсэн бүх дүнтэй зэрэгцэж очиж байна гэхээр төр маш их өмчтэй байна. Тэгсэн хэрнээ "Эрдэнэт" үйлдвэр, "Эдэнэс Тавантолгой"-г хасаад тооцохоор үлдсэн 96 компанийх нь хөрөнгийн өгөөж 0,4 хувьтай. Ийм байдлаар төр өөрийнхөө өмчийн засагалыг сайжруулж, үр ашгийг нь нэмэгдүүлнэ гэж байхгүй. Ерөөсөө гуравхан сонголт байна. Энэ компаниудыг нэгтгэх, татан буулгах, эсвэл хөрөнгийн зах зээл дээр хувьцаалах.
Тийм учраас бид цаашдаа Төрийн болон орон нутгийн өмчийн тухай хууль, Төрийн болон орон нутгийн өмчийн компанийн тухай хуулийг нь оруулж ирээд зохицуулах ёстой. Олон гишүүн Үндэсний баялгийн сангийн тухай асууж байна. Үндэсний баялгийн санг бүрдүүлж байгаа гол байгууллага нь "Эрдэнэс Монгол" нэгдэл гэдгийг хуульчилж өгсөн. Гэтэл "Эрдэнэс Монгол" нэгдэл дотор төрийн өмчит үйлдвэрийн газрын статустай байгаа "Эрдэнэт" үйлдвэр, "Монросцветмет" багтдаггүй. Энэ ТӨҮГ-уудыг шинэ хуулиар компани болгож оруулж ирээд 34 хувиар нь хуримтлалын санг бүрдүүлдэг, цаашлаад иргэн болгонд нээсэн хуримтлалын дансаараа дамжуулаад орон сууц, эрүүл мэнд, боловсролд зарцуулах боломжийг нь нээж өгөх хэрэгтэй. Тэгэхгүй бол яг өнөөдөр Үндэсний баялгийн сангийн хуулийг хэрэгжүүүлэх гэхээр гол орлого бүрдүүлээд байгаа гол компаниуд нь компанийн хуулиар зохицуулагдахгүй байна. Төрийн өмчит үйлдвэрийн газар аа гээд яваад байна.
