АСЕМ буюу Ази, Европын орнуудын дээд хэмжээний 12 дахь удаагийн чуулга уулзалт өнөөдөр Бельгийн нийслэл Брюссель хотноо эхэлнэ. Хоёр өдөр үргэлжлэх тус чуулга уулзалт "Даяаршсан сорилтын төлөө дэлхий нийтийн түншлэл" гэсэн уриан дор тогтвортой хөгжлийг хангах, цаг уурын өөрчлөлтөөс үүдэх асуудлыг даван туулахын тулд хоёр тив хоорондын худалдаа, хөрөнгө оруулалт, уялдаа холбоог өргөжүүлж, нягтруулах асуудлыг хэлэлцэх юм. Уулзалтад одоогийн байдлаар 51 улсын төрийн тэргүүн оролцохоор товлогдоод байгаа.
АСЕМ-ын энэхүү дээд хэмжээний ээлжит уулзалтын үеэр Монгол улсын гавьяат жүжигчин, “Чингис хаан” одонт дуучин Г.Ариунбаатар бүрэн хэмжээний тоглолтоо толилуулахаар болжээ. АСЕМ-ын уулзалтыг зохион байгуулагчдын зүгээс түүнд ийм санал тавьсан байна. Тэрээр тоглолтынхоо бэлтгэлийг Монголдоо хийсэн бөгөөд өөрийн багш ОХУ-ын Буриадын Ардын жүжигчин Дарима Линховойн хамт Брюсселийг зорьжээ.
Энэ тухайгаа “Миний хувьд эх орныхоо урлаг соёл, монгол хүний авьяас чадварыг олон улсад таниулан сурталчлах нэгэн чухал арга хэмжээ болж байгаа учраас хариуцлага, догдлол аль аль нь мэдрэгдэж байна. Тусалж дэмжсэн бүх хүмүүстээ баярлалаа. Эх орныхоо нэрийг өндөрт өргөөд гоё концерт тоглоод ирнэ ээ” хэмээн өөрийн цахим хуудсаар дамжуулан мэдээллээ.
