Өнгөрсөн долоо хоногт Сангийн сайд асан Ч.Хүрэлбаатар Байнгын хорооны хуралдаан дээр "Хаан банкны зарагдсан хувьцааг хэн авсан бэ? Цэвэр мөнгөөр авсан уу?" гэж асуугаад цахим орчинд дайралтад өртсөн тухайгаа бичсэн билээ.
Тэрээр "Энэ асуултын дараа үйл явдал 2 сценарийн аль нэгийн дагуу өрнөх байсан. Эхнийх нь үнэхээр яриад байгаачлан япон худалдан авсан бол Монголбанк японы холбогдох байгууллагуудаас шаардлагатай бүх тодруулгыг аваад бүх зүйл ном журмын дагуу боллоо гэдэг тайлбар УИХ-д ирүүлээд хэл амгүй дуусах байлаа. Харамсалтай нь ийм юм болсонгүй. Хоёр дахь сценарийн дагуу буюу хэл амтай үйл явдал өрнөж байгаа нь японы цаана тодорхой монгол эзэн байгааг харуулж байна. Буруу юм болж байна гэж хэлсэн хүнийг харлуулах, гүтгэх, доромжлох гээд нэг л танил технологи. Танил технологи эзэнээ бариад өгч байна" гэсэн юм.
Тэгвэл өнөөдөр түүний эхнэрийг Монголбанкны дэд ерөнхийлөгчөөр томилох болсон талаар мэдээлж эхэлжээ. Тодруулбал, Монголбанкны дэд ерөнхийлөгч Г.Энхтайваныг албан тушаалаас нь чөлөөлөхөөр яригдаж эхэлсэн бөгөөд түүний оронд Монголбанкны Мөнгөн тэмдэгтийн газрын захирал Р.Саранцэцэгийг томилно гэсэн мэдээлэл гараад байгаа юм. Р.Саранцэцэг нь 1998-2002 онд Монголбанкны Мөнгөний бодлогын газарт эдийн засагч, 2002-2005 онд Монголбанкны Мөнгөний бодлого, судалгааны газарт ахлах эдийн засагч, 2005-2016 онд Монголбанкны Мөнгөний бодлого, судалгааны газapт Мөнгөний бодлогын хэлтсийн захирлаар ажиллаж байжээ. Мөн 2016 оноос Монголбанкны Мөнгөн тэмдэгтийн газрын захирлаар ажиллаж байгаа юм. Тэрээр УИХ-ын гишүүн, Сангийн сайд асан Ч.Хүрэлбаатарын эхнэр юм.
Харин уг мэдээллийн дараа Сангийн сайд асан Ч.Хүрэлбаатар өөрийн цахим хуудаснаа "Хааны эздүүд тодорсоор л байна. Жинхэнэ эзэд тодортол багагүй хугацаа орох байх гэж би бодож байсан юм. Үгүй юм байна. Эзэд сандарч байна. Олон нийтийн анхаарлыг үндсэн асуудлаас холдуулж өөр ач холбогдолгүй сэдэв болгон хувиргах арга бол Мояачуудын үндсэн арга. Арга чинь явахгүй байна, самар сайн идээд арга тактикаа өөрчил. Хөлсний нэгэн бичээч намайг эхнэрээ Монголбанкны дэд ерөнхийлөгч болгох гээд Хаан банкны асуудал босгож ирсэн гэж. Эхнэрээ гуйж Монцамэ агентлагийн дарга болж байсан А.Баатархуяг ингэж бичихээр нэг л авцалдахгүй байна. Арай өөр хүнээр сүртэй, үнэмшилтэй бичүүлээрэй. Монголбанк 2 дэд ерөнхийлөгчтэй. Одоогийн 2 дэд ерөнхийлөгч томилогдохоосоо өмнө хоёулаа миний удирдлаганд ажиллаж байсан залуучууд. Ажилдаа сайн, өндөр боловсролтой, туршлагатай залуучууд. Дэд ерөнхийлөгч болоход нь би дэмжсэн. Цаашдаа ч дэмжинэ" гэсэн байна.
