УИХ-ын чуулганы өнөөдрийн хуралдаанаар Н.Номтойбаяр гишүүний бүрэн эрхийг түдгэлзүүлэх эсэхийг шийднэ.

Чуулганы хуралдаанаар энэ асуудлыг нээлттэй хэлэлцэх саналыг нэр бүхий гишүүд гаргасан ч УЕП-оос асуудлыг нууцын зэрэглэлтэйгээр ирүүлсэн гэдэг үндэслэлээр хаалттай горимоор хэлэлцэж эхэллээ.

УИХ-ын гишүүн, АН-ын дэд дарга Б.Пүрэвдорж уг асуудлаар "АН энэ хүний асуудал дээр нэгдсэн байр суурьт хүрсэн. Бүрэн эрхийг нь түдгэлзүүлээд шалгуулах нь зүйтэй гэж үзэж байгаа. Тиймээс чуулганы хуралдаанаар энэ асуудлыг нээлттэй хэлэлцэх нь зүйтэй" гэсэн байр суурийг илэрхийлсэн. Гэвч чуулганы хуралдааныг даргалж буй УИХ-ын дэд дарга Л.Энх-Амгалан Б.Пүрэвдорж гишүүний саналыг хүлээж авах боломжгүйг хэлээд хуралдааныг хаалттай горимд шилжүүллээ.

Сануулахад өчигдөр МАН-ын Хяналтын ерөнхий хорооноос Н.Номтойбаярыг намаас хасах шийдвэр гаргаад байгаа. Ингэхдээ түүнийг хуулийн байгууллагаас шалгаж буй асуудлаар биш, Н.Номтойбаярын бусадтай зодоон цохион хийж буй бичлэг олон нийтийн сүлжээгээр цацагдсантай холбогдуулан "Олон нийтийн газар биеэ зохисгүй авч явсан" үндэслэлээр намаас хассан билээ. 

Н.Номтойбаярыг УИХ-ын гишүүнээс түдгэлзүүлэх эсэх асуудлыг яг одоо УИХ-ын чуулганаар хаалттай хэлэлцэж байна. Хэлэлцүүлгийн эцэст гишүүд нууцаар санал өгнө.