Халдашгүй байдлын дэд хорооны өнөөдрийн хуралдаанаар УИХ-ын гишүүн Н.Номтойбаярын бүрэн эрхийг нь түдгэлзүүлэх хүсэлтийг хэлэлцэхээр төлөвлөж байсан ч дахин хойшлогджээ.
Тус дэд хорооны ирц 100 хувь бүрдэж байж Н.Номтойбаярын асуудлыг хэлэлцэнэ гэдгийг Халдашгүй байдлын дэд хорооны дарга Ц.Нямдорж өнгөрөгч баасан гаригт мэдээлсэн юм.
Гадаад томилолттой ажилласан УИХ-ын гишүүн Д.Лүндээжанцан ирсэн байгаа ч ХХААХҮ-ийн сайд Ч.Улаан томилолтоос ирээгүй байгаа тул Ч.Улаан сайдыг ирсний дараа хэлэлцхээр болжээ.
УИХ-ын гишүүн Н.Номтойбаярын бүрэн эрхийг түдгэлзүүлэх саналыг Улсын Ерөнхий прокурор Б.Жаргалсайхан энэ сарын 16-нд УИХ-д өргөн мэдүүлсэн билээ. Хуулийн дагуу саналыг УИХ 48 цагийн дотор хэлэлцэн шийдвэрлэх ёстой байдаг.
УИХ-ын гишүүний Халдашгүй байдлын дэд хороонд УИХ-ын гишүүн Ө.Энхтүвшин, Ч.Улаан, Н.Энхболд, Д.Лүндээжанцан нар багтдаг бөгөөд тус дэд хороог Хууль зүй, дотоод хэргийн сайд Ц.Нямдорж ахалдаг юм.
