УИХ дахь Ардчилсан намын зөвлөлийн дарга Д.Эрдэнэбат өнөөдөр УИХ дахь МАН-ын бүлгийн дарга Д.Тогтохсүрэнд “Ардчиллын замнал: алдаа-оноо, сургамж-сорилт” түүхэн цуврал ботийг гардуулан өглөө.
Ардчилсан хувьсгалын 30 жилийн ойн хүрээнд эмхэтгэсэн уг түүхэн цуврал ботийг улсын хэмжээний томоохон номын сангууд болон судалгааны байгууллагууд, мөн улстөрийн намуудад хандивлаж байгаа. Учир нь уг боть нь зөвхөн нэг нийгмээс нөгөө нийгэмд шилжсэн үйл явцын тухай төдийгүй, ардчиллыг бэхжүүлэх үйл явц бүхэлдээ хэрхэн өрнөж, ардчиллыг түүчээлж явсан улс төрийн намууд энэ үйл явдалд хэрхэн оролцсон, төр барьж засагласан он жилүүдийн түүх, иргэд болон иргэний нийгмийн байгууллагын оролцоо ямар байсан зэргийг тал бүрээс нь он цагийн дарааллаар эмхэтгэсэн түүхийн төдийгүй судалгааны чухал ач холбогдолтой томоохон бүтээл юм.
Судлаачид, түүхчидийн зүгээс өндөр үнэлэлт авсаар байгаа энэхүү 5 цуврал ботийг шинжлэх ухааны байгууллагууд зарим их дээд сургуулиудын дунд судалгааны гарын авлага болгон хэрэглэж эхлээд байна.
