2024 оны УИХ-ын ээлжит сонгууль эдгээр өдрүүдэд өрнөж байна. Иргэн Т.Хаянхярваагийн "Ж.Алдаржавхлан төрийн албан хаагчдыг өндөр зэрэглэлийн богд уулын газраар хахуульддаг" гэх мэдээллийн дагуу газар олголттой холбоотой ноцтой баримтыг дэлгэж байна.

Энэхүү баримтад өдгөө Засаг даргын албан тушаал эрхэлж буй нийтийн албан тушаалтан өөрийн эрх мэдлээ урвуулан ашиглаж нэг өдөр, нэг тушаалаар нийт 397 хүнд газар олгосон байх магадлалтай байна. Тодруулбал, Хан-Уул дүүргийн 14-р хорооны нутаг дэвсгэрт байх Кувейтын амны ойролцоо газар олгосон 2022 оны долдугаар сарын 7-ны өдрийн захирамж.

Мэдээллийг нягтлахад, тухайн 397 хүн тус дүүргийн захиргаанд ажилладаг, МАН-ын гишүүд, тэдгээрийн хамаарал бүхий этгээдүүд байх магадлалтай байна. Мөн зарим тооны хүмүүс нь одоо газар олгосон Засаг даргынхаа сонгуулийн сурталчилгаанд ажиллаж байна. 

Монгол Улсын жирийн иргэн өнөөдөр амьдарч буй газраа эзэмших гэж хичнээн жил болдог билээ. Өөрийн газартаа 10-аад жил амьдарч байж эзэмшилдээ авч чадахгүй, төрийн албаны үүднээс хавтастай бичиг баримтаа бариад буцаж байгаа тохиолдол олон. Гэтэл МАН-ын гишүүнчлэлтэй л бол хүссэн байршилдаа газар эзэмшиж байгаа энэхүү баримт бол эрх баригч нам иргэдээ хэрхэн ялгаварлаж, гадуурхаж байгааг харуулах тодоос тод зураг юм. 

Мөн энэхүү захирамжийн хууль зөрчиж байгаа бас нэг үйлдэл нь захирамж гарсны дараа газар эзэмшигчид өргөдөлөө бичсэн явдал байна. Хуулиндаа газар эзэмших хүсэлтэй иргэд эхлээд өргөдөл гаргадаг бол энэ тохиолдолд газар эзэмших эрх олгогдсоны дараа өргөдлүүдээ бичжээ.

Үүнээс харахад Хан-Уул дүүргийн засаг дарга эрх мэдлээ урвуулан ашиглаж, өөрийн намын гишүүддээ газар олгосон байгаа юм. Дээрх мэдээллийг иргэдэд нээлттэй байх egazar.gov.mn дээрээс харж болно.