"Оюутан цэрэг" хөтөлбөрийн бүртгэлийг гуравдугаар сарын 6-10-ны хооронд e-Mongolia-аар дамжуулан цахимаар явуулна.
Шаардлага хангасан оюутнууд гуравдугаар сарын 14-ний өдрөөс сургуулийнхаа харьяа дүүргийн цэргийн штабт өөрийн биеэр очиж бүртгэлээ баталгаажуулна. Харин гуравдугаар сарын 20-ноос эрүүл мэндийн үзлэгийг зохион байгуулж, биеийн тамирын шалгалт авах юм.
Гурван шатны сонгон шалгаруулалтад тэнцсэний дараа онолын сургалтад хамрагдах эрхтэй болно. Онолын сургалтыг амралтын өдрүүдэд хоёр сарын хугацаанд зохион байгуулах юм.
Дээрх шаардлагыг хангасан оюутнууд ирэх зургадугаар сарын 15-наас эхлээд хоёр сарын хугацаатай хээрийн дадлага сургуулилалтад явах бөгөөд цэргийн тангаргаа өргөснөөр цэргийн нэгдүгээр зэргийн бэлтгэл үүрэгтнээр бүртгэгдэх юм.
Оюутан цэрэгт элсүүлэх журам:
- Улаанбаатар хотын их, дээд сургуулийн нэгдүгээр дамжааны оюутан;
- 2.8-аас дээш голч дүнтэй;
- 2023 оны зургадугаар сарын 15-ны өдрөөр 18 нас хүрсэн байх;
- Эрүүл мэндийн даатгал төлсөн байх шаардлагатай.
Эдгээр шаардлагыг хангасан оюутан e-Mongolia системээр хүсэлтээ явуулах боломжтой.
