Засгийн газрын ээлжит хуралдаан Төрийн ордонд эхэлж, улс орны хөгжил, эдийн засгийн чухал асуудлуудыг хэлэлцэж байна. Энэ удаагийн хуралдаанд нийт 25 асуудал багтжээ.
Хамгийн гол асуудлуудын нэг нь ОХУ-аас БНХАУ руу байгалийн хий нийлүүлэх хоолойг Монгол Улсын нутаг дэвсгэрээр дамжуулах төслийн явц юм. Мөн уул уурхайн бүтээгдэхүүний экспортын байдал, валютын нөөцийн нөхцөл байдал, төмөр замын баруун болон зүүн коридор байгуулах ажлын хэрэгжилт зэрэг томоохон эдийн засгийн сэдвүүдийг хэлэлцэж байна.
Үүнээс гадна Тавантолгойн дулааны цахилгаан станцын төслийн явц, хөгжлийн бэрхшээлтэй иргэдийн эрхийг хамгаалах олон улсын зөвлөмжийн хүрээнд 2025-2031 онд хэрэгжүүлэх үйл ажиллагааны төлөвлөгөө, төрийн байгууллагад ирүүлсэн өргөдөл, гомдлын шийдвэрлэлт зэргийг хэлэлцэхээр төлөвлөжээ.
Засгийн газар эдгээр асуудлыг нэн тэргүүнд хэлэлцэн шийдвэрлэх замаар эдийн засгийн тогтвортой байдал, дэд бүтцийн хөгжил, нийгмийн эмзэг бүлгийн эрхийг хангахад чиглэсэн бодлогоо үргэлжлүүлэн хэрэгжүүлэхээр зорьж байна.
Эх сурвалж: Засгийн газрын Хэвлэл мэдээлэл.
