Олон улсын мэргэжлийн боксын Дэлхийн боксын холбоо (WBA)-ны Төв Азийн аваргын бүсийн төлөөх тэмцээнд гавьяат тамирчин Э.Цэндбаатар Мексикийн тамирчин Педро Родригезийг ялж, мэргэжлийн боксын зургаа дахь бүсээ хүртсэн юм.
Энэхүү тэмцээнд гавьяат тамирчин Н.Төгсцогт болон Монголын таван боксчин дэлхийн чансааны өндөр тамирчидтай хүч үзэж, бүгд ялалт байгуулжээ. Ерөнхийлөгч тамирчдад баяр хүргэж, цаашдын тэмцээн уралдаанд нь өндөр амжилт хүсэв.
Э.Цэндбаатар тавдугаар сард болох ДАШТ-ий эрхийн төлөө өрсөлдөнө
Э.Цэндбаатар энэ удаагийн ялалтаараа АНУ-ын Лос-Анжелес хотноо тавдугаар сард болох Дэлхийн аваргад өрсөлдөх эрхийн төлөөх тэмцээнд оролцох болзлоо хангажээ. Тэрбээр багийнхантайгаа АНУ-д бэлтгэл базаах төлөвлөгөөтэй байгаагаа Ерөнхийлөгчид дуулгасан бөгөөд Монголд мэргэжлийн боксыг хөгжүүлэх, залуу тамирчдыг дэмжих зорилгоор Ерөнхийлөгчийн ивээл дор жил бүр боксын тэмцээн зохион байгуулах саналаа илэрхийлэв.
“Night of Champions Ulaanbaatar-2025” тэмцээн үзэгчдийг татав
Монголд анх удаа зохион байгуулсан “Night of Champions Ulaanbaatar-2025” тэмцээний бүх тасалбар урьдчилан зарагдаж, 150 мянга гаруй хүн шууд дамжуулалтыг үзсэн нь мэргэжлийн боксын хөгжилд өндөр ач холбогдолтой үйл явдал болжээ.
Эх сурвалж: Монгол Улсын Ерөнхийлөгчийн Тамгын газар