УИХ-ын сонгуульд өрсөлдөх нам, эвслүүд Сонгуулийн хуульд заасны дагуу гуравдугаар сарын 25-ны дотор мөрийн хөтөлбөрөө аудитын байгууллагад хүргүүлсэн. Нийт 15 нам, дөрвөн эвслийн нийт 19 мөрийн хөтөлбөрийг Үндэсний аудитын газар хүлээн авснаа мэдэгдсэн. 

Аудитын байгууллага мөрийн хөтөлбөрүүдийг хүлээн аваад Сонгуулийн тухай хуульд заасан мөрийн хөтөлбөрт тусгахыг хориглосон заалт байгаа эсэх, Монгол Улсын хөгжлийн үзэл баримтлалд нийцсэн эсэх болон мөрийн хөтөлбөрт тусгасан санхүүгийн эх үүсвэр шаардсан арга хэмжээг хэрэгжүүлэхэд шаардагдах хөрөнгө нь Төсвийн тогтвортой байдлын тухай хуульд нийцэх эсэхэд дүгнэлт хийснээс найман нам, дөрвөн эвслийн мөрийн хөтөлбөр буцаагдсан юм. Үүнд эрх баригч МАН, сөрөг хүчин АН болон МАХН, ШИНЭН-ын эвслүүдийн мөрийн хөтөлбөр багтсан. ҮАГ-аас эдгээр нам, эвслийн мөрийн хөтөлбөрийг амлалтын шинжтэй, эдийн засгийн үндэслэл, тооцоогүй гэж үзжээ. Мөн шаардлагад нийцээгүй мөрийн хөтөлбөрүүдийг зүйл, заалт бүрээр засахыг аудитын байгууллагаас анхааруулсан байна. 

Нам, эвслүүд аудитын байгууллагын зөвлөмжийн дагуу мөрийн хөтөлбөрөө засаж, дахин хүргүүлэх хугацаа өнгөрөгч бямба гаригт /2020.04.11/ дуусгавар болсон бөгөөд "Буцаагдсан 12 мөрийн хөтөлбөрийг бүгдийг нь засч, дахин ирүүлсэн. Тэдгээрт дүгнэлт хийгээд дөрөвдүгээр сарын 23-ны дотор шаардлагад нийцсэн эсэх талаар мэдээлнэ” гэв.