Үндэсний аюулгүй байдлын зөвлөл өнөөдөр 16:00 цагаас хуралдахаар болжээ.

Шинэ төрлийн коронавирусийн халдвар дэлхийн 130 гаруй улсад тархаж, ДЭМБ-гаас коронавирусийг цар тахлын хэмжээнд хүрснийг албан ёсоор зарласан. 

Үүнтэй холбогдуулан ҮАБЗ өнгөрсөн пүрэв гаригт хуралдсан ч ямар нэгэн чиглэл, зөвлөмж гаргаагүй. Харин коронавирусийн тархалттай холбоотой цаг үеийн нөхцөл байдлын талаар мэргэжлийн байгууллагуудын мэдээллийг сонссон юм. 

Дэлхийд үүсээд буй нөхцөл байдал олон улсын эдийн засагт хүчтэй нөлөө үзүүлж буй бөгөөд манай улсын эдийн засагт ч нөлөөлөх нөхцөл үүсээд байгааг эдийн засагчид анхааруулсаар байна.

Иймд цаг үеийн тус асуудлаар Үндэсний аюулгүй байдлын зөвлөл мэргэжлийн байгууллагуудын мэдээллийг сонсох төлөвлөгөөтэй байгаа аж. 

ҮАБЗ-ийн бүрэлдэхүүнд Ерөнхийлөгч, УИХ-ын дарга, Ерөнхий сайд багтдаг.