Зуны Олимпын XXXIII дахь их наадам "Парис-2024"-ын нээлтийн ёслолын ажиллагаа Парис хотын Сена мөрний эрэгт болно гэж зохион байгуулагчид нь мэдэгдлээ. Олимпын наадамд оролцогч тамирчдын парадыг 600 мянга гаруй хүн үзэж сонирхох боломжтой түүхэн дэх хамгийн том нээлтийн ёслолын ажиллагаа болно гэдгийг онцлов. 

Мөн анх удаагаа нээлтийн ажиллагааны ихэнх хэсгийг үзэгчдэд үнэ төлбөргүй үзүүлэх гэдгээрээ шинэлэг бөгөөд цэнгэлдэх хүрээлэнд үзсэнээс 10 дахин их хүн үзэх болно гэж тодотгов.

Нээлтийн ёслолын үеэр тамирчид 160 гаруй завиар оролцох бөгөөд Нотр Дам, Лувр, Эйфелийн цамхаг зэрэг Парисын соёлын байгууллагуудын хажуугаар дамжин өнгөрөх аж. 

“Парис-2024” наадмын зохион байгуулах хорооны ерөнхийлөгч Тони Эстангуэт "Энэ хотыг бүхэлд нь Олимпын цэнгэлдэх хүрээлэн болгон хувиргах спорт болон соёлыг хослуулсан хосгүй өвөрмөц мөч байх болно" гэсэн юм. 

Дашрамд, Зуны Олимпын XXXIII дахь их наадам 2024 оны Долдугаар сарын 26-нд эхлэх билээ.