Улаанбаатар хотын Ерөнхий менежер цаг үеийн асуудлаар болон хийж байгаа, цаашид хэрэгжүүлэх ажлуудынхаа талаар мэдээлэл хийлээ. 

Өнөөдрийн хувьд нийслэлийн хориглосон бүсээс мал гаргах ажлын явцын талаар мэдээлэл өглөө.

Нийслэлийн Засаг даргын захирамжаар ажлын хэсэг байгуулж, нэгдүгээр сарын 21-23-ны хугацаанд 396 албан хаагч, 53 тээврийн хэрэгсэлтэй ажиллан, нийт 4,557 толгой малыг хориглосон бүсээс гаргажээ.

Хотын менежер М.Баяраа "Партизан зэрэг газраас Улаанбаатарт мал орж ирж байна. Холбогдох албаныхан эдгээр малыг гаргаж ажиллалаа. Нийслэлд мал орж ирснээр ногоон байгууламжийг эвдэн сүйтгэх, замын хөдөлгөөний нөхцөл байдал хүндрэх, осол гарах тохиолдол гарсан. Мөн гоц халдварт өвчний эрсдэлтэй тул нийслэлээс малыг гаргаж байна.

Дөрөвдүгээр сар хүртэл малыг тууж гаргах ажил үргэлжилнэ. Энэ удаад хотыг тойрсон малчидтайгаа хамтран энэхүү ажлыг зохион байгуулж байна.

Хотын Захирагчийн ажлын албаныхан дүүргүүд дээр ажиллаж, хорооны Засаг дарга нартай ногоон байгууламж, тохижилт үйлчилгээ, бүтээн байгуулалтын ажлын талаар санал солилцож байна. Өнөөдөр Сонгинохайрхан дүүрэгт ажилласан. Ирэх долоо хоногт Баянзүрх дүүрэгт ажиллана" гэв.

Харин Хотын даргын төлөөлөгч Н.Сугар "Нийслэлээс малыг гаргаж байгаа нь ад үзэж байгаа зүйл биш" гэлээ.